اسلام آباد: سیکرٹری جنرل پاکستان عوامی تحریک کی اپوزیشن راہنماؤں سے ملاقاتیں

پاکستان عوامی تحریک نے سانحہ ماڈل ٹاؤن کیس میں انصاف کے حصول کے لیے دیگر سیاسی جماعتوں کے راہنماؤں سے ملاقاتیں شروع کر دی ہیں۔ پاکستان عوامی تحریک کے مرکزی سیکرٹری جنرل خرم نواز گنڈاپور نے 2 مئی 2016 کو مجلس وحدت المسلمین کے مرکزی سیکرٹری جنرل راجہ ناصر عباس اور 3 مئی 2016 کو پاکستان پیپلز پارٹی کے راہنماء میاں منظور خان وٹو سے ملاقات کی۔ خرم نواز گنڈا پور آج 4 مئی کو اسلام آباد میں اپوزیشن لیڈر سید خورشید شاہ و دیگر اپوزیشن رہنماؤں سے ملاقات کرینگے۔

خرم نواز گنڈا پور نے میاں منظور وٹو سے ملاقات کے دوران کہا کہ پانامہ لیکس معاشی جبکہ سانحہ ماڈل ٹاؤن حکومتی عسکری دہشتگردی کا کیس ہے۔ عوامی تحریک کے رہنماء نے کہا کہ 14 شہداء اور 85 سے زائد زخمیوں کو انصاف دلوانے کیلئے قانونی جنگ لڑ رہے ہیں تاہم انصاف کیلئے سڑکوں پر آنا پڑا تو گریز نہیں کریں گے۔ میاں منظور وٹو نے کہا کہ پیپلز پارٹی سانحہ ماڈل ٹاؤن کی اول روز سے مذمت کر رہی ہے اور انصاف کے مطالبہ میں ہم شہدائے ماڈل ٹاؤن کے ورثا کے ساتھ ہیں۔ دونوں رہنماؤں نے مزید ملاقاتوں اور تعاون پر اتفاق کیا۔