پیٹرولیم قیمتوں میں اضافہ بلا جواز ہے: سردار عمر دراز خان
حکومت بتائے قیمتوں میں اضافہ کیوں کیا گیا، عالمی سطح پر کوئی قیمتیں نہیں بڑھیں
پٹرولیم مصنوعات کی قیمتوں میں اضافہ سے مہنگائی کا طوفان آئے گا، سیکرٹری کوآرڈینیشن پی اے ٹی
لاہور(یکم جولائی2025ء) پاکستان عوامی تحریک کے مرکزی سیکرٹری کوآرڈینیشن سردار عمر دراز خان نے کہا ہے کہ پیٹرولیم مصنوعات کی قیمتوں میں حالیہ اضافہ بلا جواز ہے، عالمی سطح پر قیمتوں میں کوئی اضافہ نہیں ہوا، اس اضافہ سے مہنگائی کا نیا طوفان آئے گا، قیمتیں بڑھا کر بجٹ میں تنخواہوں اور پنشنز میں ہونے والا معمولی اضافہ بے اثر ہو گیا۔ حکومت ایک ہاتھ سے تھوڑا دیتی ہے اور دوسرے ہاتھ سے زیادہ نکال لیتی ہے۔
انہوں نے کہا کہ حکومت کی جانب سے بار بار قیمتیں بڑھانے کا رجحان اس بات کا ثبوت ہے کہ پالیسی سازی میں عوام کی حالتِ زار کو نظر انداز کیا جا رہا ہے ان خیالات کااظہار انہوں نے مرکزی سیکرٹریٹ ماڈل ٹاؤن میں منعقدہ سیمینار سے خطاب کرتے ہوئے کیا۔
انہوں نے کہا کہ موجودہ حکومت عوام کو ریلیف دینے کے بجائے ہر ماہ نئے معاشی دباؤ میں دھکیل رہی ہے۔ پیٹرول کی قیمت میں 8 روپے 36 پیسے، ڈیزل میں 10 روپے 39 پیسے، اور لائٹ ڈیزل میں 9 روپے 45 پیسے کا اضافہ عوام کے صبر کا امتحان ہے۔ اس فیصلے سے ٹرانسپورٹ، غذائی اشیاء، سبزی، دودھ اور دیگر ضروریات زندگی کی قیمتوں میں مزید اضافہ ہوگا۔
سردار عمر دراز خان نے کہا کہ حکومت کو چاہیے کہ وہ اعداد و شمار کے بجائے عوامی حالت کو دیکھ کر فیصلے کرے۔ عوام کا اعتماد تبھی بحال ہو سکتا ہے جب ریاست ان کی مشکلات کو سمجھے اور ان کے لیے آسانیاں پیدا کرے۔ صرف بجٹ کے توازن یا عالمی مالیاتی اداروں کی شرائط پوری کرنے سے ملک کے اندرونی مسائل حل نہیں ہوں گیانہوں نے کہا کہ پاکستان عوامی تحریک عوام کی آواز بن کر حکومت کو باور کرانا چاہتی ہے کہ اب وقت آ گیا ہے کہ مہنگائی کے طوفان کو روکنے کے لیے ہنگامی بنیادوں پر اقدامات کیے جائیں۔
سردار عمر دراز خان نے کہا کہ مسلسل مہنگائی سے عوام میں مایوسی اور اضطراب پیدا ہو رہا ہے، جو کسی بھی مہذب معاشرے کے لیے خطرے کی علامت ہیانہوں نے مطالبہ کیا کہ حکومت فوری طور پر پیٹرولیم مصنوعات کی قیمتوں پر نظر ثانی کرے، اور ایسے معاشی فیصلے کرے جن سے ریلیف ملے، نہ کہ عوام مزید بوجھ تلے دبیں۔
تبصرہ