پاکستان عوامی تحریک نے جشن آزادی تقاریب کا شیڈول جاری کر دیا

قرآن خوانی، پرچم کشائی، یوتھ کنونشن، شجر کاری مہم کی تقاریب منعقد ہوں گی
تقریبات کا مقصد نوجوان نسل میں جذبہ حب الوطنی کو فروغ دینا ہے: ترجمان عوامی تحریک

لاہور (10 اگست 2025) پاکستان عوامی تحریک نے جشن آزادی کے حوالے سے خصوصی تقریبا ت کا تفصیلی شیڈول جاری کر دیا۔ تقاریب کا آغاز 11 اگست سے ہوگا اور 14 اگست تک جاری رہیں گی۔ جشن آزادی کی تقاریب میں کارکنان، طلبا، خواتین اور مختلف شعبہ ہائے زندگی سے تعلق رکھنے والے افراد بھرپور شرکت کریں گے۔ شیڈول کے مطابق 11 اگست کو قرآن خوانی اور دعائیہ تقریب منعقد کی جائے گی جس میں وطن عزیز کی سلامتی، خوشحالی کے لئے خصوصی دعائیں کی جائیں گی۔

منہاج یوتھ لیگ 12 اگست کو مرکزی سیکرٹریٹ میں پرچم کشائی اور ملک گیر شجر کاری مہم کا آغاز کرے گی۔ 12 اگست کو نوجوانوں کے عالمی دن کے حوالے سے’’نوجوان پاکستان کا مستقبل‘‘ کے عنوان سے سیمینار منعقد کیا جائے گا جس میں ملک بھر کی یوتھ تنظیموں کے نمائندے شرکت کریں گے۔ 13 اگست کو مصطفوی سٹوڈنٹس موومنٹ کے زیراہتمام ملک گیر پرچم کشائی مہم اور ریلیاں نکالی جائیں گی۔ 14 اگست کی صبح مرکزی سیکرٹریٹ ماڈل ٹائون میں قومی پرچم کشائی کی تقریب منعقد ہو گی جس میں پاکستان عوامی تحریک کے مرکزی، صوبائی، ضلعی رہنما شرکت کریں گے، لاہور سمیت ملک بھر میں جشن آزادی کے حوالے سے تقاریب منعقد کیا جائیں گی۔

منہاج یونیورسٹی، منہاج کالجز اور منہاج ایجوکیشن سوسائٹی کے زیراہتمام چلنے والے سکولوں میں تحریک آزادی کے حوالے سے پروگرامز منعقد ہونگے اور تمام عمارتوں پر پاکستانی پرچم آویزاں کیے جائینگے۔ ترجمان پاکستان عوامی تحریک کے مطابق ان تقریبات کا مقصد نوجوان نسل میں آزادی کی اہمیت کو اجاگر کرنا،اتحاد و یکجہتی کو فروغ دینا ہے۔ 14 اگست کے حوالے سے مرکزی تقریب پاکستان عوامی تحریک کے مرکزی سیکرٹریٹ ماڈل ٹاؤن میں منعقد ہو گی جس میں عوامی تحریک کے مرکزی قائدین اور دیگر مذہبی، سیاسی، سماجی رہنما شرکت کرینگے۔ تمام اضلاع کی تنظیمات دعائیہ تقاریب بھی منعقد کرینگی اور کیک بھی کاٹے جائیں گے۔